காலத்தை கடத்தலாம்; ஜெனிவாவை கடக்க முடியுமா?

ஜெனிவா | ஐ.நா மனித உரிமைகள் பேரவை

கடினமாகி வரும் ஜெனிவா களம்

கட்டுரையாளர் - ஹரிகரன்

கடந்த ஆண்டு ஒக்டோபர் மாதம் ஐ.நா மனித உரிமைகள் பேரவையில் நிறைவேற்றப்பட்ட A/HRC/60/1 தீர்மானத்திற்கு அமைய, எதிர்வரும் செப்டெம்பர் மாதம் 7ஆம் திகதி ஆரம்பமாகும் ஐ.நா மனித உரிமைகள் பேரவையின் கூட்டத்தொடரில், இலங்கை தொடர்பான எழுத்துமூல அறிக்கையை ஐ.நா மனித உரிமைகள் ஆணையாளர் பணியகம் சமர்ப்பிக்க உள்ளது. ஒக்டோபர் 9ஆம் திகதி வரை நடைபெறவுள்ள ஐ.நா மனித உரிமைகள் பேரவையின் 63வது கூட்டத்தொடரில் சமர்ப்பிக்கப்படவிருக்கும் இந்த அறிக்கையின் தயாரிப்புப் பணிகள் ஏற்கெனவே தொடங்கப்பட்டு விட்டன. அந்த அறிக்கையின் முன்கூட்டிய பிரதி இன்னும் சில நாட்களில் இலங்கை அரசாங்கத்துக்கு அனுப்பப்படும் என ஜெனிவா தகவல்கள் கூறுகின்றன. அதேவேளை, இந்தக் கூட்டத்தொடரின் நிகழ்ச்சிநிரல் தொடர்பான முன்னாயத்தக் கலந்துரையாடல், எதிர்வரும் 24ஆம் திகதி ஜெனிவாவில் உள்ள ஐ.நா தலைமையகத்தில் இடம்பெறவுள்ளது.

இலங்கையில் நல்லிணக்கம், பொறுப்புக்கூறல் மற்றும் மனித உரிமைகள் தொடர்பான நிலைமைகளின் முன்னேற்றங்கள் குறித்து ஐ.நா மனித உரிமைகள் ஆணையாளர் பணியகம் சமர்ப்பிக்கவுள்ள A/HRC/63/18 இலக்க அறிக்கை, தற்போதைய அரசாங்கத்துக்கு முக்கியமான ஒன்றாக இருக்கும். ஏனெனில், 2025ஆம் ஆண்டு பேரவையின் 60வது கூட்டத்தொடர் இடம்பெற்ற போது, தேசிய மக்கள் சக்தி அரசாங்கம் பதவிக்கு வந்து ஓராண்டு காலமே ஆகியிருந்தது. பொறுப்புக்கூறல் தொடர்பான செயற்பாடுகளை முன்னெடுப்பதற்கும், வாக்குறுதிகளை நிறைவேற்றுவதற்கும் புதிய அரசாங்கத்திற்குக் காலஅவகாசம் வழங்கப்பட வேண்டும் என்ற வாதம் வலுவாக முன்வைக்கப்பட்டதற்கு அது ஒரு முக்கியமான காரணமாகும். அப்போது இலங்கைக்கு இரண்டு ஆண்டுகள் காலஅவகாசம் கொடுக்கப்பட்டு, தீர்மானம் நிறைவேற்றப்பட்டது. அந்தக் காலஅவகாசம் அடுத்த ஆண்டு செப்டெம்பர் மாதம் நிறைவடையவுள்ளது.

அதற்கு முன்னதாக, அடுத்த மாதம் நடைபெறும் 63வது கூட்டத்தொடரில் பொறுப்புக்கூறல், மனித உரிமைகள் மற்றும் நல்லிணக்கம் தொடர்பான செயற்பாடுகளின் முன்னேற்றங்கள் குறித்து எழுத்துமூலம் அறிக்கை சமர்ப்பிக்க வேண்டும் என, ஐ.நா மனித உரிமைகள் பேரவை ஐ.நா மனித உரிமைகள் ஆணையாளருக்குப் பணித்திருந்தது. அதற்கமையவே இந்தக் கூட்டத்தொடரில் அறிக்கை சமர்ப்பிக்கும் பணிகள் முன்னெடுக்கப்பட்டு வருகின்றன. இலங்கையில் முன்னேற்றகரமான செயற்பாடுகள் இடம்பெற்றதாக அந்த அறிக்கையில் ஐ.நா மனித உரிமைகள் ஆணையாளர் கூறக்கூடிய நிலை இல்லை என்பது தெளிவு; கடந்த இரண்டு ஆண்டுகளில் பொறுப்புக்கூறல் கடப்பாடுகளை நிறைவேற்றுவது தொடர்பாக அரசாங்கம் எந்த நடவடிக்கையும் மேற்கொள்ளவில்லை.

ஜெனிவா தீர்மானங்களின் அடிப்படை நோக்கம், போரின் இறுதிக்கட்டத்தில் இடம்பெற்ற மீறல்களுக்குப் பொறுப்புக்கூறும் செயற்பாடுகளை முன்னெடுப்பதுதான். ஆனால் கடந்த இரண்டு ஆண்டுகளில் இலங்கை அரசாங்கம் அதற்கான நடவடிக்கைகள் எதையும் மேற்கொண்டிருக்கவில்லை. 60/1 தீர்மானத்தில், பாதிக்கப்பட்டவர்கள் மற்றும் அவர்களின் பிரதிநிதிகளின் முழுப் பங்கேற்புடன், மனித உரிமை மீறல்கள் மற்றும் சர்வதேச மனிதாபிமானச் சட்ட மீறல்கள் குறித்து முழுமையான, பாரபட்சமற்ற விசாரணைகள் நடத்தப்பட வேண்டும் என்றும்; இலங்கை அரசாங்கம் அரசியலமைப்பின்படி அரசியல் அதிகாரத்தைப் பரவலாக்கவும், வடக்கு மற்றும் கிழக்கு மாகாணங்களில் மாகாண சபைத் தேர்தல்களை நடத்தி, இந்த அமைப்புகள் திறம்படச் செயற்படுவதை உறுதிசெய்ய வேண்டும் என்றும்; பயங்கரவாதத் தடைச் சட்டத்தை ரத்து செய்ய வேண்டும் என்றும்; கருத்துச் சுதந்திரத்தைப் பாதுகாப்பதற்காக இணையப் பாதுகாப்புச் சட்டத்தில் சீர்திருத்தங்கள் செய்யப்பட வேண்டும் என்றும் வலியுறுத்தப்பட்டிருந்தது. இவை எதிலும் முன்னேற்றங்கள் காணப்படவில்லை.

60/1 தீர்மானத்தின் ஆணைப்படி, ஐ.நா மனித உரிமைகள் ஆணையாளர் பணியகத்தினால் இலங்கை அரசாங்கத்திற்குச் சாதகமான அறிக்கை ஒன்றைச் சமர்ப்பிக்க முடியாத நிலை ஏற்பட்டுள்ளது.

தீர்மானம் நிறைவேற்றப்பட்ட பின்னர் ஏற்பட்டுள்ள முன்னேற்றங்களை அறிக்கையிடுமாறே ஐ.நா மனித உரிமைகள் ஆணையாளர் கோரப்பட்டிருக்கிறார். அவர் கடந்த ஆண்டு இலங்கைக்குப் பயணம் மேற்கொண்டதுடன், செம்மணி மனிதப் புதைகுழி அகழ்வுப் பணிகளையும் பார்வையிட்டிருந்தார். செம்மணிப் புதைகுழி தொடர்பாக சர்வதேச விசாரணை நடத்தப்பட வேண்டும் என பாதிக்கப்பட்டவர்கள் அவரிடமும் கோரிக்கை விடுத்திருந்தனர். செம்மணிப் புதைகுழிகள் தொடர்பாகத் தொழில்நுட்ப ரீதியான ஆதரவை வழங்கத் தயாராக இருப்பதாக ஐ.நா மனித உரிமைகள் ஆணையாளர் வோல்கர் டர்க் அப்போது கூறியிருந்தார். ஆனால் அந்தத் தொழில்நுட்ப உதவியை ஐ.நாவிடம் கோர வேண்டியது இலங்கை அரசாங்கமே ஆகும்; இலங்கை அரசாங்கம் கோரினால்தான் அதனை ஐ.நாவினால் வழங்க முடியும். ஐ.நா தானாக வந்து தலையிடவோ, தொழில்நுட்ப ஆதரவை வழங்கவோ முடியாது.

ஜெனிவாவில் உள்ள ஐ.நா அரண்மனையில் அமைந்துள்ள மனித உரிமைகள் பேரவையின் கூட்ட மண்டபம் — இங்குதான் எதிர்வரும் 63வது கூட்டத்தொடரில் இலங்கை தொடர்பான அறிக்கை சமர்ப்பிக்கப்படவுள்ளது. (படம்: Wikimedia Commons)

செம்மணிப் புதைகுழி அகழ்வு நீண்டு கொண்டே செல்கிறது; இதுவரை அகழப்பட்ட எலும்புக்கூடுகளை ஆய்வு செய்வதற்கு உரிய நடவடிக்கைகள் எடுக்கப்படவில்லை, காலம் கடந்து கொண்டிருக்கிறது. அரசாங்கம் இதனை ஆய்வுக்குட்படுத்தி அடுத்த கட்ட நடவடிக்கைக்குத் தயாராகவில்லை. இந்த விடயம் ஐ.நா மனித உரிமைகள் ஆணையாளரின் அறிக்கையில் இடம்பெறும் சாத்தியங்கள் உள்ளன. புதைகுழி அகழ்வு என்பது அதனைக் கண்டறிவதுடன் நின்று விடுவதில்லை; தடயவியல் ஆய்வுகள், புலனாய்வு என்பன முக்கியமானவை. அந்தக் கட்டத்திற்குள் இலங்கை அரசாங்கம் நுழையவில்லை. இவ்வாறாக, ஜெனிவா தீர்மானத்தில் குறிப்பிடப்பட்டுள்ள ஒவ்வொரு விடயத்திலும் இலங்கை அரசாங்கம் முன்னேற்றங்களைப் பதிவு செய்திருக்கவில்லை. காலம் கடத்தும் உத்திகளின் மூலமாக, அரசாங்கம் ஜெனிவாவையும் உலக நாடுகளையும் ஏமாற்றுவதில் உறுதியாக இருக்கிறது.

இந்தச் சூழலில், இன்னொரு இராஜதந்திரக் குழப்பமும் நிகழ்ந்திருக்கிறது. ஐ.நா மனித உரிமைகள் ஆணையாளரின் பதவிக்காலம் வரும் ஒக்டோபர் 17ஆம் திகதியுடன் முடிவடையவிருந்த நிலையில், அவரது பதவிக்காலத்தை நீடிக்கும் தீர்மானம் ஐ.நா பொதுச்சபையில் கடந்த ஜூலை 24ஆம் திகதி நிறைவேற்றப்பட்டது. இலங்கை உள்ளிட்ட 13 நாடுகள் அந்தத் தீர்மானத்தின் மீதான வாக்கெடுப்பின் போது நடுநிலை வகித்திருந்தன. இலங்கை வாக்களிக்காமல் ஒதுங்கிக் கொண்டது இராஜதந்திர வட்டாரங்களில் பலத்த சர்ச்சைகளை உருவாக்கியது; வோல்கர் டர்க்குடனான முரண்பாட்டின் விளைவா இந்த முடிவு என்ற கேள்வியையும் அது எழுப்பத் தூண்டியது.

ஐ.நா மனித உரிமைகள் ஆணையாளர் வோல்கர் டர்க் — அவரது பதவிக்காலத்தை நீடிக்கும் தீர்மான வாக்கெடுப்பில் இலங்கை நடுநிலை வகித்தது இராஜதந்திர வட்டாரங்களில் சர்ச்சையை உருவாக்கியது. (படம்: Wikimedia Commons)

ஜெனிவா கூட்டத்தொடர் நெருங்கியுள்ள நிலையில், அதில் வோல்கர் டர்க் அறிக்கையைச் சமர்ப்பிக்கவுள்ள நிலையில், இலங்கை நடுநிலை வகித்த விவகாரம் சாதகமான ஒன்றாகப் பார்க்கப்படவில்லை. இலங்கை அரசாங்கத்திற்கும், நியூயோர்க்கில் உள்ள ஐ.நாவுக்கான இலங்கைப் பிரதிநிதிகளுக்கும் இடையிலான தொடர்பாடல் குழப்பங்களின் விளைவே இந்த முடிவிற்குக் காரணம் என்றும் கூறப்படுகிறது. இந்த வாக்கெடுப்பு நடக்கவிருப்பது குறித்து வெளிவிவகார அமைச்சுக்கு அறிவிக்கப்படவில்லை என்றும், அதனால் அதில் எவ்வாறு செயற்படுவது என அறிவுறுத்தல் வழங்கப்படவில்லை என்றும் கூறப்பட்டுள்ளது. இதனால் ஐ.நா பொதுச்சபை வாக்கெடுப்பில் பங்கேற்காமல் இலங்கை ஒதுங்கியிருந்தது. இதன் பாரதூரத்தன்மை குறித்த விமர்சனங்கள் எழுந்த நிலையில், அதனைச் சமாளிக்கும் முயற்சிகள் மேற்கொள்ளப்பட்டுள்ளன; கொழும்பில் உள்ள ஐ.நா பிரதிநிதிக்கு வெளிவிவகார அமைச்சர் விஜித ஹேரத் இதுபற்றி விளக்கமளித்துள்ளார் என்றும் தெரிவிக்கப்பட்டுள்ளது. இவ்வாறான ஒரு நிலை ஜெனிவாவில் இலங்கைக்குச் சாதகமற்ற நிலையைத் தோற்றுவிக்கலாம் என்ற அச்சமும் அரசாங்கத்துக்கு ஏற்பட்டுள்ளது.

ஜெனிவாவில் சமர்ப்பிக்கப்படும் அறிக்கைகள் ஒருபோதும் தனிப்பட்ட விருப்பு வெறுப்புகளை அடிப்படையாகக் கொண்டவையல்ல. சில ஆணையாளர்கள் தனிப்பட்ட முனையில் சில விவகாரங்களை முன்னிலைப்படுத்தக் கூடும்; ஆனால் தற்போதைய நிலையில் ஐ.நா மனித உரிமைகள் ஆணையாளர் பணியகத்தின் அறிக்கையில் இடம்பெறக்கூடிய விடயங்கள் பொதுவாகச் சாதகமற்றதாகவே இருக்கும். ஏனெனில், ஜெனிவா தீர்மானத்தின் முன்னேற்றங்களைப் பட்டியலிடுமாறு கோருகின்ற போது, பொறுப்புக்கூறல் விடயத்தில் முன்னேற்றங்கள் ஏற்படாதிருப்பது பற்றியோ, மாகாண சபைகளுக்குத் தேர்தல் நடத்தப்படாதிருப்பது பற்றியோ, பயங்கரவாதத் தடைச் சட்டம் நீக்கப்படாதிருப்பது பற்றியோ, காணிகள் விடுவிப்பு இடம்பெறாதிருப்பது பற்றியோ குறிப்பிடாமல் இருக்க முடியாது. இது தவிர, சிறைச்சாலைகளில் அண்மையில் இடம்பெற்ற வன்முறைகளும் ஜெனிவாவில் அதிக கவனத்திற்குள்ளாகும்.

இவையெல்லாம், அனுரகுமார திசாநாயக்கவின் அரசாங்கத்திற்கு ஜெனிவாவுக்கான பயணம் மென்மையானதாக இருக்கும் என எதிர்பார்ப்பதற்கில்லை என்பதையே காட்டுகின்றன. வாக்குறுதிகளை அல்லது கடப்பாடுகளை நிறைவேற்றாமல் காலத்தைக் கடத்தும் எண்ணத்தில் உள்ள எந்த அரசாங்கத்திற்கும், ஜெனிவா தீர்மானங்களோ, அறிக்கைகளோ உவப்பானதாக இருக்கமாட்டாது.

— © எழுகை கலெக்டிவ் நியூஸ்ரூம் —
Elugai Collective Newsroom Publication