புதிய தமிழகம் 2026: சித்தாந்தச் சிக்கலா? தேர்தல் அழுத்த உத்தியா? - டாக்டர் கிருஷ்ணசாமியின் அரசியல் பயணம்.

தேர்தல் களம் | கட்சி அலசல்

தமிழக சட்டமன்றத் தேர்தல் – 2026

பட்டியல் வரிசை எண் - 9 - புதிய தமிழகம் கை.அறிவழகன்

உடுமலைப்பேட்டை கருப்பசாமியின் மகனாக பிறந்த கிருஷ்ணசாமி, மதுரை மருத்துவக் கல்லூரியில் மருத்துவம் படித்தார். பாரதியார் பல்கலைக்கழகத்தில் மருத்துவத்தில் முதுகலை முடித்தார்.

மருத்துவராக வாழ்க்கையை தொடங்கியவர், தன் சமூகத்தின் வலியை நேரில் பார்த்தார். தமிழகத்தின் தலித் துணை சமூகங்களான பள்ளர் என்றழைக்கப்பட்ட இன்றைய தேவேந்திரகுல வேளாளர் சமூகத்திற்கு திமுக மற்றும் அதிமுக போன்ற திராவிட கட்சிகள் நியாயமான பிரதிநிதித்துவம் அளிக்கவில்லை என்று உணர்ந்தார்.

அந்த உணர்வின் விளைவாக 1997 டிசம்பர் 15 அன்று புதிய தமிழகம் கட்சி உதயமானது. 1996 சட்டமன்றத் தேர்தலில் ஓட்டப்பிடாரம் தொகுதியில் சுயேச்சையாக வெற்றி பெற்ற டாக்டர் கிருஷ்ணசாமி, ஒரு மருத்துவர் மட்டுமல்ல, ஒரு அரசியல் சக்தியாகவும் மாறினார். அந்த மாற்றமே புதிய தமிழகம் கட்சியின் கதை.

புதிய தமிழகம் கட்சி தலைவர் டாக்டர் கே. கிருஷ்ணசாமி — மருத்துவரிலிருந்து அரசியல் சக்தியாக மாறியவர்; தேவேந்திரகுல வேளாளர் சமூகத்தின் குரல்.

கட்சியின் கொள்கைகளும் சாதனைகளும்

"புதிய தமிழகம்" கட்சி தலித் சமூகங்களின் சமூக நீதி, சமத்துவம் மற்றும் அரசியல் பிரதிநிதித்துவத்திற்காக தொடர்ந்து குரல் கொடுக்கிறது. கல்வி, சுகாதாரம் மற்றும் கிராமப்புற வளர்ச்சி என்பவை கட்சியின் மூன்று முக்கிய தூண்கள்.

தேவேந்திரகுல வேளாளர் சமூகத்திற்கான தனி உள் இட ஒதுக்கீடு கோரிக்கை, தலித் துணை சமூகங்களுக்கிடையே நியாயமான இட ஒதுக்கீட்டுப் பகிர்வு, சாதி மக்கள் தொகை கணக்கெடுப்பு போன்றவை கட்சியின் மையக் கோரிக்கைகள்.

தென் தமிழகத்தில், குறிப்பாக தூத்துக்குடி, திருநெல்வேலி, விருதுநகர் மாவட்டங்களில் தேவேந்திரகுல வேளாளர் சமூகத்தில் கணிசமான வாக்கு வங்கியை கட்சி உருவாக்கியது கட்சியின் மிகப்பெரிய சாதனை.

தேர்தல் வரலாறு — ஊசலாட்டத்தின் கதை

புதிய தமிழகம் கட்சியின் தேர்தல் வரலாறு ஒரு ஊசலாட்டத்தின் கதை.

1998 ஆம் ஆண்டு நடைபெற்ற தேர்தலில் 15 தொகுதிகளில் தனித்துப் போட்டியிட்டுத் தோற்றது. ஆனால் தென்காசியில் கிருஷ்ணசாமி மற்றும் சிவகாசியில் சத்தியமூர்த்தி இருவரும் ஒரு லட்சத்திற்கும் அதிகமான வாக்குகள் பெற்றனர், அது அன்றைய அரசியல் சூழலில் சிறிய கட்சிக்கு பெரிய செய்தி.

2001 திமுக, பாரதீய ஜனதா மற்றும் சில சாதி அடிப்படையிலான கட்சிகளை உள்ளடக்கிய ஜனநாயக முற்போக்கு கூட்டணியில் சேர்ந்து 10 இடங்களில் போட்டியிட்டது. இங்கே கவனிக்க வேண்டியது, டாக்டர் கிருஷ்ணசாமி தனது முதல் பாஜக தொடர்பை இங்கேயே தொடங்கினார்.

2011 அதிமுக கூட்டணியில் இணைந்து டாக்டர் கிருஷ்ணசாமி ஓட்டப்பிடாரத்தில் 71,330 வாக்குகள் பெற்று வெற்றி பெற்றார். A. ராமசாமி நீலக்கோட்டையில் 75,124 வாக்குகள் பெற்று வெற்றி பெற்றார். சட்டமன்றத்தில் இரண்டு இடங்கள் கட்சியின் மிகப்பெரிய தேர்தல் சாதனை.

2019 AIADMK-BJP-PMK கூட்டணியில் இணைந்து தென்காசியில் போட்டியிட்டுத் தோற்றார். பாஜக கூட்டணியில் நேரடியாக இணைந்தது கட்சியின் சித்தாந்த நெருக்கடியின் அடையாளம்.

2024 நாடாளுமன்றத் தேர்தலில் அதிமுக தலைமையிலான கூட்டணியில் இணைந்து போட்டியிட்டது புதிய தமிழகம். இங்கே நாம் நேர்மையாக இருக்க வேண்டும். டாக்டர் கிருஷ்ணசாமியின் சில நிலைப்பாடுகள் அவரை ஆதரிக்கும் சமூகத்தையே கேள்வி கேட்க வைத்தன.

தூத்துக்குடி, திருநெல்வேலி, விருதுநகர் மாவட்டங்கள் — இங்கேதான் தேவேந்திரகுல வேளாளர் சமூகத்தில் புதிய தமிழகம் கட்சியின் வாக்கு வங்கி மிகவும் வலுவாக உள்ளது.

ஐந்து தடுமாற்றங்கள்

தடுமாற்றம் 1 — NEET ஆதரவு:

2017 ஆகஸ்டில் NEET-க்கு ஆதரவாக ஆர்ப்பாட்டம் நடத்தினார், அதிமுக, திமுக உள்பட பெரும்பாலான கட்சிகள் NEET தேர்வை எதிர்த்த நேரத்தில். ஒடுக்கப்பட்ட மாணவர்களுக்கு NEET ஒரு கனவை கொல்லும் கொடுமை என்று மற்ற சமூக நீதி கட்சிகள் உரக்கக் குரல் எழுப்பிய போது டாக்டர் கிருஷ்ணசாமி மாற்றுக் குரல் கொடுத்தார். அது அவரது சமூகத்தினரையே குழப்பியது.

தடுமாற்றம் 2 — இந்தித் திணிப்பு ஆதரவு:

2019-ல் தமிழக மாணவர்களுக்கு இந்தியை மூன்றாம் மொழியாக சேர்க்க வேண்டும் என்று ஆதரித்தார். தமிழ்நாட்டில் இந்தித் திணிப்பை எதிர்ப்பது என்பது ஒரு மொழியியல் சார்ந்த சமூக உணர்வு — அதை டாக்டர் கிருஷ்ணசாமி புரிந்துகொள்ளவில்லை.

தடுமாற்றம் 3 — RSS பாதுகாப்பு:

RSS ஒரு தேசியவாத அமைப்பு, வகுப்புவாத அமைப்பல்ல என்று தொடர்ந்து கூறினார். தங்களை தாழ்த்தப்பட்ட பிரிவில் இருந்து பிற்படுத்தப்பட்ட வகுப்பிற்கு மாற்றம் செய்ய வேண்டும் என்று லாபி செய்தார். இந்தியை பாஜக அரசு திணிப்பு நடக்கவில்லை என்று வாதிட்டார். ஒடுக்கப்பட்ட தலித் சமூகங்களை பெரும்பாலும் அடக்கி ஒடுக்கும் சக்திகளுடன் (பாஜக மற்றும் RSS) டாக்டர் கிருஷ்ணசாமி தொடர்ந்து நெருக்கமாக இருந்தது அவரது மிகப்பெரிய கோட்பாட்டு முரண்.

தடுமாற்றம் 4 — மருத்துவக் கல்லூரி இடம்:

முன்னாள் சிபிஐ(எம்) சட்டமன்ற உறுப்பினர் கே. பாலபாரதி டாக்டர் கிருஷ்ணசாமியின் மீது ஒரு கடுமையான குற்றச்சாட்டை வைத்தார் — 2011-ல் கிருஷ்ணசாமி, தன் மகளுக்கு மருத்துவக் கல்லூரியில் சிறப்பு ஒதுக்கீட்டு இடம் பெற்றதற்காக முதலமைச்சர் ஜெயலலிதாவிற்கு நன்றி கூறினார். NEET ஆதரவு மற்றும் இந்த நடவடிக்கை இரட்டை வேட முகமாக சித்தரிக்கப்பட்டது.

தடுமாற்றம் 5 — பத்திரிகையாளரிடம் சாதி கேட்டது:

2019 செய்தியாளர் சந்திப்பில், NEET மற்றும் ஹைட்ரோகார்பன் பற்றிய கேள்விகளுக்கு பதில் சொல்வதற்கு பதிலாக, கேள்வி கேட்ட பத்திரிகையாளரிடம் "உங்கள் சாதி என்ன?" என்று கேட்டார் டாக்டர் கிருஷ்ணசாமி. ஒரு சமூக நீதி கட்சியின் தலைவர் என்று தன்னை அடையாளம் காண்பவர் ஒரு பத்திரிகையாளரிடம் சாதி கேட்பது என்பது மிகப்பெரிய முரண்பாடு.

மார்ச் 27, 2026 — முக்கியமான திருப்பம்

டாக்டர் கிருஷ்ணசாமி ஆளும் திமுக அரசை வேரறுக்க AIADMK மற்றும் BJP உடன் கூட்டணி அமைக்க பெரிய அளவில் முயற்சி செய்தேன் என்று ஒப்புக்கொண்டார். அதிமுகவிடம் 12-15 இடங்கள் மற்றும் ஒரு ராஜ்யசபா இடம் கேட்டதற்கு முதலில் 7 இடங்களுக்கு ஒப்புக்கொண்ட எடப்பாடி பிறகு 5 ஆகக் குறைத்தார், பேச்சுவார்த்தை முறிந்தது.

இப்போது புதிய தமிழகம் 60 முதல் 70 தொகுதிகளில் தனியாகப் போட்டியிட தயாராகிறது. 2026 தேர்தலில் திமுக அரசை பதவியிறக்குவது தன் கட்சியின் முதன்மை நோக்கம் என்று கிருஷ்ணசாமி அறிவித்தார். எந்த கட்சி ஆட்சி அமைத்தாலும் அமைச்சர் பதவி உள்பட அதிகாரப் பங்கு வேண்டும் என்று கோரினார்.

புதிய தமிழகம் கட்சி 2026 தேர்தலில் 60-70 தொகுதிகளில் தனியாகப் போட்டியிட தயாராகிறது — தென் தமிழகத்தில் திமுக வெற்றி வாய்ப்பை பாதிக்கும் சாத்தியம் உள்ளது.

தாக்கம் என்ன?

60-70 தொகுதிகளில் தனியாகப் போட்டியிட்டால் புதிய தமிழகம் கட்சியால் தேர்தல் முடிவை மாற்றும் அளவிலான தாக்கம் செலுத்த முடியுமா? தென் தமிழகத்தில் — குறிப்பாக தூத்துக்குடி, திருநெல்வேலி, விருதுநகர் மாவட்டங்களில் தேவேந்திரகுல வேளாளர் வாக்குகளை பிரிப்பதன் மூலம் திமுக அல்லது அதிமுக வேட்பாளர்களின் வெற்றி வாய்ப்பை பாதிக்கலாம். ஆனால் அது குறிப்பிட்ட தொகுதிகளில் மட்டுமே சாத்தியம், தமிழக அளவில் அல்ல.

2011-ல் இரண்டு இடங்கள் மட்டுமே வென்ற கட்சி 70 இடங்களில் தனியாக நின்று என்ன சாதிக்கும்? அது ஒரு அரசியல் அழுத்த உத்தி — வெற்றிக்கான நோக்கம் அல்ல.

முடிவுரை — கட்சியின் எதிர்காலம்

புதிய தமிழகம் கட்சி ஒரு முக்கியமான இடத்தில் நிற்கிறது. கட்சியின் 26ஆவது ஆண்டு விழாவில் கிருஷ்ணசாமியின் மகன் ஷ்யாம் கிருஷ்ணசாமி இளைஞர் அணித் தலைவராக நியமிக்கப்பட்டார். அடுத்த தலைமுறைக்குப் பயணம் தொடங்கியுள்ளது.

ஆனால் கட்சி தன் சித்தாந்தத் தெளிவை மீட்டெடுக்க வேண்டும். பாஜக நெருக்கத்திலிருந்து விலக வேண்டும். தலித் சமூக நலனை மட்டுமே மையமாகக் கொண்டு நடந்தாலும், விடுதலைச் சிறுத்தைகளின் தலைவர் முனைவர் திருமாவளவன் போல பொது சமூகத்தின் நம்பிக்கையைப் பெற வேண்டும். இந்தி ஆதரவு, NEET ஆதரவு போன்ற முரணான நிலைப்பாடுகளை திருத்திக்கொள்ள வேண்டும்.

டாக்டர் கிருஷ்ணசாமி ஒரு மருத்துவர், தன் சமூகத்தின் வலியைப் புரிந்துகொண்டவர். ஒரு கட்சியைத் தொடங்கி, தன் சமூகத்திற்காக போராடியவர். இரண்டு முறை சட்டமன்றத்தில் குரல் கொடுத்தவர்.

ஆனால் அவரது தடுமாற்றங்கள் — பாஜகவுடனான நெருக்கம், RSS பாதுகாப்பு, இந்தி ஆதரவு, NEET ஆதரவு — இவை அவரின் நம்பகத்தன்மையை பொது சமூகத்தில் கேள்விக்குள்ளாக்கியுள்ளன.

ஒரு தலித் சமூகத்தின் குரலாக தொடங்கிய கட்சி இந்துத்துவ பிற்போக்கு சக்திகளுடன் கூட்டணி அமைக்கும்போது அது வெறும் அரசியல் தேவையா? அல்லது சித்தாந்த சமரசமா? என்பதை அவர்தான் தெளிவுபடுத்த வேண்டும்.

இந்தக் கேள்விக்கு பதில் சொல்வது டாக்டர் கிருஷ்ணசாமியின் கடமை மட்டுமல்ல, புதிய தமிழகம் கட்சியின் எதிர்காலத்தையும் தீர்மானிக்கும். ஆனால், தேவேந்திரகுல வேளாளர் சமூகத்தின் இன்றைய மதிப்பீடுகளை மாற்றி அமைத்த சிற்பிகளில் டாக்டர் கிருஷ்ணசாமி மிக முக்கியமானவர் என்பதில் நான் எப்போதும் முரண்படுவதில்லை.

— கை.அறிவழகன்

— © எழுகை கலெக்டிவ் நியூஸ்ரூம் —
Elugai Collective Newsroom Publication