வெறுங்கையுடன் வந்த வாங் யி!
இலங்கை - சீனா உறவில் நிலவும் மர்மமான மௌனம்
ஆபிரிக்க நாடுகளுக்கான பயணத்தை மேற்கொண்ட சீன வெளியுறவு அமைச்சர் வாங் யி, கடந்த 12ஆம் திகதி அதிகாரபூர்வமாக, தென்னாபிரிக்காவின் டர்பன் நகரில் இருந்து கட்டுநாயக்க விமான நிலையத்தை வந்தடைந்திருந்தார். அவர் இரண்டு நாட்கள் இங்கு தங்கியிருப்பார் என முன்னர் தகவல்கள் வெளியாகியிருந்த போது, கிட்டத்தட்ட அரை நாள் பயணத்துடன் பீஜிங்கிற்குப் புறப்பட்டுச் சென்றிருந்தார்.
தென்னாபிரிக்காவில் இருந்து கிழக்காசியா நோக்கி பயணம் மேற்கொள்ளும் உலகத் தலைவர்கள் கட்டுநாயக்க விமான நிலையத்தில் குறுகிய நேரம் ஓய்வெடுப்பது வழக்கம். ரணில் விக்கிரமசிங்க ஜனாதிபதியாக இருந்த போது மேக்ரோன் போன்றவர்களை மரியாதை நிமித்தம் விமான நிலையத்திற்கே சென்று சந்தித்தார்.
ஆனால், வாங் யி வந்தபோது ஜனாதிபதியோ பிரதமரோ அவரைச் சந்திக்கவில்லை. நள்ளிரவில் அவரை வரவேற்பதற்கு வெளியுறவு அமைச்சின் அதிகாரிகள் மற்றும் சீன தூதுவர் மட்டுமே சென்றிருந்தனர். மறுநாள் காலை வெளியுறவு அமைச்சர் விஜித ஹேரத் மாத்திரம் வாங் யியை அவர் தங்கியிருந்த விடுதிக்குச் சென்று சந்தித்தார்.
அண்மையில் இந்திய வெளியுறவு அமைச்சர் ஜெய்சங்கர் இலங்கைக்கு வந்தபோது, பேரிடர் நிவாரணத்திற்காக 450 மில்லியன் டொலர்களை வழங்குவதாக அறிவித்திருந்தார். இது இலங்கைக்கு வழங்கப்பட்ட மிகப்பெரிய தொகையாகும். இதனைத் தொடர்ந்து, உலகின் இரண்டாம் பெரிய பொருளாதாரமான சீனாவிடமிருந்து பெரிய எதிர்பார்ப்பு நிலவியது.
இலங்கை அரசாங்கம் மீண்டும் மீண்டும் பேரிடரால் பாதிக்கப்பட்ட வீதிகள், பாலங்கள் மற்றும் ரயில்வே கட்டமைப்பு மேம்பாட்டிற்கு உதவி கேட்ட போதிலும், சீனா மௌனம் காத்து வருகிறது. சீன ஆய்வுக் கப்பல்களுக்கான தடையை நீக்க வேண்டும் என சீனா தொடர்ந்து வலியுறுத்தி வருகிறது.
இந்தத் தடை அகற்றப்படுவதற்கும் சீனாவின் உதவிப் பொதி அறிவிக்கப்படுவதற்கும் இடையில் ஏதோ ஒரு தொடர்பு இருக்கலாம் என இராஜதந்திர வட்டாரங்கள் தெரிவிக்கின்றன. வாங் யி, "காட்டுச் சட்டம்" மீண்டும் எழுச்சி பெறுவதை எதிர்க்கும் என்று குறிப்பிட்டது அமெரிக்காவின் நடவடிக்கைகளை மறைமுகமாகச் சாடிய செயலாகும்.
சீனாவிடமிருந்து பெரும் தொகையான உதவியைப் பெற்றுக்கொள்ளலாம் என்ற இலங்கையின் எதிர்பார்ப்பை சீனா தற்காலிகமாக ஏமாற்றத்துக்குள்ளாக்கியிருக்கிறது. சீனா ஏதோ ஒரு பெரிய உத்தரவாதத்தை இலங்கையிடமிருந்து எதிர்பார்க்கிறது. அது கிடைக்கும் வரை உதவிப் பொதிகள் அறிவிக்கப்படுவதற்கான சாத்தியங்கள் குறைவாகவே தெரிகின்றன.
0 Comments