கண்ணீரில் கரையும் வாழ்வும் கைவிடப்படும் நீதியும்

இலங்கை | மனித உரிமைகள்

கண்ணீரால் கலைந்த நினைவுகள்: அரச பயங்கரவாதத்தின் சித்திரவதைக் கூடாரங்களும் தமிழ் அரசியல் கைதிகளின் தீரா நரகமும்

முன்னுரை: சட்டம், ஜனநாயகம், சமத்துவம் என்ற போலி முகமூடிகளுக்குப் பின்னால் ஒளிந்திருக்கும் இலங்கை பேரினவாத அரசின் கோர நஞ்சை அப்பட்டமாக அம்பலப்படுத்துகிறது 'இனமொன்றின் குரல்' முகநூல் பக்கத்தின் இந்த நெஞ்சை உருக்கும் பதிவு. தமிழ் அரசியல் கைதிகளின் இருண்டுபோன வாழ்வையும், அதிகார வர்க்கத்தின் இரட்டை நிலைகளையும் வரலாற்றின் சாட்சியமாக 'எழுகதிர்' வாசகர்களின் பார்வைக்குக் கொண்டுவருகிறோம்.

1999 ஆம் ஆண்டு, அப்போதைய ஜனாதிபதி சந்திரிகா குமாரதுங்க மீதான குண்டுவெடிப்புச் சம்பவம் தொடர்பாக வெறும் சந்தேகத்தின் அடிப்படையில் கைது செய்யப்பட்டவர் சைவ சமய மதகுருவான ரகுபதி சர்மா. அவரது வாழ்க்கை, பேரினவாத அதிகாரத்தின் இரக்கமற்ற பிடியில் சிக்கிய ஓர் மனிதனின் துயர வரலாறாகும். இலங்கையின் மிகக் கொடூரமான பயங்கரவாதத் தடைச் சட்டம் (PTA) அவரைச் சிறைக்குள் தள்ளியதுடன், மனித நாகரிகமே தலைகுனிய வேண்டிய கொடூரமான சித்திரவதைக் கூடாரங்களுக்குள்ளும் அவரை இழுத்துச் சென்றது.

தமிழ் அரசியல் கைதிகளின் துயரம் மற்றும் சித்திரவதை குறித்த பதிவு. (படம்: மாதிரி)

ஒரு ஆன்மீக மதகுரு என்கிற குறைந்தபட்ச மனிதநேய தயவுமின்றி அவர் மீது வன்முறைகள் கட்டவிழ்த்து விடப்பட்டன. ஆசாரமிக்க ஒரு சைவ அர்ச்சகராக, தீவிர சைவ உணவை மட்டுமே உண்டு வந்த அவரது பூணூல் மிருகத்தனமாக அறுத்தெறியப்பட்டது. அவரது மத நம்பிக்கையை காலால் மிதித்து, கட்டாயப்படுத்தி அசைவ உணவையும் மதுபானத்தையும் உண்ண நிர்பந்தித்து அவரது மனத்தூய்மையை அவமதித்தார்கள்.

இதுமட்டுமன்றி, அவரைத் தலைகீழாகத் தொங்கவிட்டு அடித்தார்கள்; முட்கம்பி சுற்றப்பட்ட இரும்புக்குழாயை ஆசனவாயில் நுழைத்து வெளியே இழுத்துக் கொடூரம் செய்தார்கள். அவரது அந்தரங்க உறுப்புகளை மேசை இழுப்பறையில் (Desk Drawer) வைத்து நசுக்கி இன்புற்றார்கள். இறுதியாக, அவருக்குத் துளியும் புரியாத சிங்கள மொழியில் எழுதப்பட்ட அறிக்கைகளில், மரண பயத்தைக் காட்டி, சித்திரவதையின் அச்சத்தாலேயே வலுக்கட்டாயமாகக் கையெழுத்து வாங்கினார்கள்.

அரச சட்ட மருத்துவ அறிக்கை (JMO) அவரது உடலில் இருந்த தீக்காயங்களையும், தழும்புகளையும், சித்திரவதையின் கோர வடுக்களையும் தெளிவாக உறுதிப்படுத்தியது. ஆனாலும் அவருக்கு நீதி கிடைக்கவில்லை. கைது செய்யப்பட்ட முதல் 18 மாதங்களுக்குத் தன்னை ஒரு சட்டத்தரணி மூலம் பிரதிநிதித்துவப்படுத்தக்கூட அவருக்கு அனுமதி மறுக்கப்பட்டது. இந்த அநீதிகளின் உச்சமாக, இறுதியில் 300 ஆண்டுகள் சிறைத்தண்டனை என்ற இடி அவர் தலையில் இறக்கப்பட்டது.

சித்திரவதையின் கொடூர வடுக்களால் அவரால் சரியாக நடக்கக்கூட முடியவில்லை. நீரிழிவு மற்றும் கடுமையான இரத்த அழுத்தப் பிரச்சினைகளால் தளர்ந்த உடலோடு சிறைக்கொட்டடிக்குள் துடித்தார். தன் அடிப்படைத் தேவைக்காக அவர் கோரிய சக்கர நாற்காலி (Wheelchair) கூட இனவாத அதிகாரிகளால் மறுக்கப்பட்டது. சிறைக்குள் கோவிட்-19 தொற்று பரவியபோது, முறையான மருத்துவ சிகிச்சையின்றி படுக்கையிலேயே வலியால் கதறினார்.

இந்த நரகத் துயரம் ரகுபதி சர்மாவோடு மட்டும் நின்றுவிடவில்லை; அவரது மனைவி வசந்தி ரகுபதி சர்மாவும் இதே காரணத்திற்காகக் கைது செய்யப்பட்டிருந்தார். கடுமையான சித்திரவதைகளுக்குப் பின், தன் இளமைக் காலத்தின் 15 ஆண்டுகளை அவர் சிறைக்குள் இழந்தார். இறுதியில், 2015 ஆம் ஆண்டு நீதிமன்றத்தால் அவர் "குற்றமற்றவர்" என விடுவிக்கப்பட்டபோது, இழந்த வாழ்வை எவராலும் மீட்டுக் கொடுக்க முடியவில்லை.

பெற்றோர் இருவரும் சிறைக்குள் முடங்கிக் கிடந்த அந்தப் பயங்கரமான காலப்பகுதியில், ஆதரவற்ற நிலையில் இருந்த அவர்களின் 6 மற்றும் 8 வயது பிஞ்சுக் குழந்தைகள் மட்டக்களப்பில் உள்ள ஓர் இல்லத்தில், பெற்றோரின் அரவணைப்பின்றி ஏங்கித் தவித்த வேதனை வார்த்தைகளில் அடங்காதது. இருபத்திரண்டு ஆண்டுகளுக்கும் மேலான இளமைக்காலம், குடும்பத்தின் நிம்மதி, பிள்ளைகளின் எதிர்காலம் என அத்தனையையும் அந்த இராஜதந்திரக் கொடுங்கோன்மை பறித்துக்கொண்டது.

நீண்ட போராட்டத்திற்குப் பிறகு, 2022 நவம்பரில் ரணில் விக்ரமசிங்கே அவர்களின் பொதுமன்னிப்பின் கீழ் அவர் வெளியே வந்தார். ஆனால், சிதைக்கப்பட்ட அவரது வாழ்விற்கு யார் பதில் சொல்வது?

உண்மையில் சைவ மத குரு ரகுபதி சர்மா மட்டுமல்ல... மனைவியை இழந்து, தாயற்ற தன் பிஞ்சுக் குழந்தைகள் அழுது புலம்பியும் சிறைக் கொட்டடிக்குள் ஆயுள் தண்டனைக் கைதியாகப் பூட்டப்பட்டிருக்கும் ஆனந்த சுதாகரன் போன்ற நூற்றுக்கணக்கான தமிழ் அரசியல் கைதிகளின் கதறலும், அவர்களின் குடும்பங்களின் கண்ணீரும் இந்த நாட்டின் பேரினவாத அதிகாரத்தின் கதவுகளை என்றுமே இலகுவில் திறப்பதில்லை.

ஆனால் இதே இலங்கையில், சமூகத்தில் வெறுப்பையும் இனவாதத்தையும் விதைத்து, தீவிர கிரிமினல் குற்றப் பின்னணியோடு நீதிமன்ற அவமதிப்புக்காக சிறை தண்டனை பெற்ற பொதுபல சேனா அமைப்பின் கலகொட அத்தே ஞானசார தேரர் விடயத்தில் மட்டும், முற்போக்கு பேசும் நிறைவேற்று அதிகார ஜனாதிபதி திரு. அனுரகுமார திஸநாயக்க வெறும் இரண்டு நாள்களுக்குள் சட்ட விதிகளையே தூக்கியெறியத் தயாராகிவிட்டார்!

"சட்டம் அனைவருக்கும் சமம்" என்ற போலிப் புரட்சி வார்த்தைகளின் பின்னாலிருக்கும் ஜேவிபி (JVP) தலைமையிலான புதிய தேசிய மக்கள் சக்தி (NPP) அரசின் அதிகாரத்தின் கோர நஞ்சையும், மாறாத பேரினவாதப் புத்தியையும் புரிந்து கொள்ள இந்த ஒரு சம்பவமே மிகச்சிறந்த வரலாற்றுச் சான்றாகும்.

— © எழுகை கலெக்டிவ் நியூஸ்ரூம் —
Elugai Collective Newsroom Publication